मोठी रेषा

                     मोठी रेषा

           एक राजा आपल्या बागेत हिंडण्यासाठी आला. तेथे राजकुमाराबरोबर प्रधानपुत्र व काही महापौरांची मुले खेळ खेळत होती. राजाला पाहताच ती सर्व त्यांंच्याजवळ गोळा झाली. राजाने त्यांची बुद्धी परीक्षा घेण्यासाठी जमिनीवर रेषा ओढली व तो मुलांना म्हणाला, " ही रेषा लहान करून दाखवा. मात्र, ती पुसायची नाही किंवा तिची काटछाट पण करायची नाही, अशी त्यासाठी अट आहे." सगळी मुले विचारात पडली. रेषेला हात न लावता तिला छोटी कशी करायची? प्रत्येक जण एकमेकाकडे पाहू लागला. इतक्यात मंत्र्याचा मुलगा पुढे आला व म्हणाला, “महाराज! मी आपण सांगितलेल्या शर्तीनुसार रेषा लहान करून दाखवितो. मला फक्त आपल्या जवळची काठी द्या." राजाने काठी दिल्याबरोबर त्याने राजाने काढलेल्या रेषेच्या खाली दुसरी एक मोठी रेष काठीने मातीवर काढली व म्हणाला, "बघा, आता आपण काढलेली रेषा छोटी केली की नाही?” राजाने हसत त्याची पाठ थोपटली व म्हणाला, "तू मी घेतलेल्या बुद्धीच्या परीक्षेत पास झाला आहेस, मी तुला तुझ्या बुद्धिचातुर्याबद्दल बक्षीस देत आहे." सर्वांनी टाळ्यांच्या गडगडाट केला. स्वतःची उन्नती करण्याचे दोन मार्ग असतात, दुसऱ्याचे गुण कमी करून किंवा स्वत:चे गुण वाढवून पहिला मार्ग रेषा पुसण्याचा असतो तर दुसरा मोठी रेषा काढण्याचा असतो.